ABENDUAREN 28AN SAKABANAKETAK BEREIZTEN GAITUZTEN KILOMETROAK ELKARTASUN PAUSOZ BETEKO DITUGU
Elkartasun lasterketa antolatu dugu herriko hainbat kirolarik. Preso eta iheslarien egoera larria da, herritik urrunduta daude, eta lasterketa honen bidez elkartasuna adierazi nahi diegu. Abenduaren 28an izango da lasterketa, 10:30ean haurrena eta 11.30ean helduena. Plazatik abiatuko da helduen 6,5km-ko lasterketa.
Helduen elkartasun lasterketan izena emateko herriko hainbat tokitan dago aukera: Sorgin-zulon, Amazkarren, Garmendi txokolategian eta Kiroldegian. Aukera horiez gain, internetez herrikrossa.com-en ere izena emateko aukera izango da. Hala ere, antolakuntza errazteko garaiz izena ematea eskatzen dugu. Lasterkari guztiek kamiseta bana jasoko dute, baina horretarako beharrezkoa izango da abendua 10a baino lehen izena ematea. Gainera, aurrez izena ematen dutenek 8 euro ordaindu beharko dute, egunean bertan, aldiz, 12 euro ordaindu beharko dira.
Abenduaren 27an lasterkariek dortsala eta kamiseta hartzeko aukera izango dute 17:00etatik 20:00etara plazan. Izena emateko aukera ere izango da.
Haurren lasterketa ere izango da 10:30ean. Aurreko urteetan ez dute izena eman, baina aurten izena eman beharko dute eta izen-ematea doakoa izango da. Xehetasun gehiago aurrerago zehaztuko ditugu.
Gainera, korrika ibiltzeko ohiturarik ez duenarentzat, edota jendearekin entrenatu nahi duenarentzat astelehenetan eta ostegunetan 19:00etan entrenamentu saioak egingo ditugu eta azaroaren 10ean hasiko dira saio horiek. Beraz, ez dago aitzakiarik: jantzi arropa eta oinetako egokiak, eta atera zu ere korri egitera!
Bestalde, gogoratu nahi dugu herriko presoak 1200 kilometrora urrunduta daudela eta astero senide eta lagunek bidaia hori egin behar izaten dutela bisita egiteko. Elkartasun pauso hauen bidez distantzia hori murrizteko pausoa eman nahi dugu, preso eta iheslarien eskubideak errespetatuak izan daitezen sortuko dugun SAREaren parte baikara gu ere.