Urtero gabonen inguruan Oiartzunen egiten den lasterketa urtarrilaren 15ean izango da. Herriko hainbat korrikalarik lasterketa herrikoia antolatu dute beste urte batez ere. Oiartzungo auzoak zeharkatuko dituen lasterketa da. Oiartzungo plazatik abiatuko da eta Ergoien, Altzibar, Iturriotz eta Ugaldetxotik pasa ondoren, berriro plazan bukatuko da 6,6km-ko ibilbidea duen lasterketa. Ez da lasterketa soila. Bakegintza eta elkarbizitza oinarri hartuta presoen auzia askatzea bultzatzeko ekimena da. Sarek egiten duen herritarren aktibazioaren adibidea da lasterketa hau. Herriko korrikalariek jarritako alea. Joanes etxera bidean jarriko duten pausoak emateko ekarpena. Haurren lasterketa egingo da 10:30ean, plaza inguruan itzuliak emanez. Adinaren arabera itzuli, bat, bi edo hiru emango dira. Helduen lasterketa 11:00etan hasiko da. Izena herrikrosa.eus webgunean eman behar da eta 12€ ordaindu beharko dira. Dortsal guztiak ez balira salduko, egunean bertan 18€tan erosteko aukera izango da.