Abenduaren 29an 400 pertsonatik gora bildu ginen: korrika haurrak eta helduak, segurtasun lanetan, pintxoak prestatzen... guztiak helburu berarekin.
Pasa den urriaren 11z geroztik, 10 urte dira Joanes atxilotu eta espetxeratu zutela. 10 urte hauetan, hiru espetxe ezberdinetan eduki dute, horietako bat bera ere ez Euskal Herrian: Fleury (796 km), Soto del Real (425 km), eta Herrera de la Mancha (642 km, egun bertan dago).
Nahiz eta dagoeneko 10 urte beteta izan, oraindik ere salbuespeneko legedia aplikatzen zaio; hau da, lehenengo graduko erregimenean mantentzen dute, eta bere sorterritik ehunka kilometrora urrunduta dago. Gainera, Joanesek behin baino gehiagotan egin du Euskal Herrira gerturatzeko eskaera, eta behin baino gehiagotan eskatu du 1.gradutik 2.graduko erregimenera alda dezaten, baina kasu guztietan ezezko erantzuna jaso du.
Argi dago, Joanesek gaur egungo Espainiako espetxe legedia aplikatuz gero, bi eskaera horiek onartzeko baldintza guztiak betetzen dituela; eta beraz, salbuespen legedi honekin amaitu beharra dugula. Horretarako elkartu gara gaurkoan ere, pausoz pauso eta urratsez urrats, kilometroz kilometro, Joanes etxeratze bidean jartzeko. Benetako konponbidea nahi badugu, eta horregatik, premiazkoa dugu Joanes etxera bidean jartzeko urratsak ematea, herritarrak aktibatzea eta kalera/bidera ateratzea.
Amai dezagun astebururo-astebururo egin beharreko kilometro uholdearekin, amai dezagun 105 motxiladun haurrek pairatzen duten sufrikario honekin; amai dezagun, beraz, salbuespen legedia honekin behingoz!
Hori dela eta, gogoratu gu guztiok zita garrantzitsua dugula urtarrilaren 11n; ez dadila inor etxean geratu, goazen denok Bilbora!/Baionara!
Korapiloak askatzeko garaia da, bidea elkarrekin egiteko garaia da, Oiartzun! Goazen ba elkarrekin aurrera!